因為...
- 哥哥間中就會說:弟弟好可愛;
- 當弟弟病時,哥哥會說:弟弟真係辛苦,可憐,好慘!
- 當其他朋友想與弟弟玩或抱他時,翊翊就會望到實一實,又或上前用身體擋住,恐怕弟弟給別人帶走;
- 吃飯時,翊翊要弟弟坐於他的旁邊,愈近愈開心;
- 而弟弟那隻充滿飯,菜,汁,口水的小手摸到哥哥的衣服或頭髮時,哥哥不但沒有嬲,還笑得很開心,非常歡迎;
- 當弟弟食飯顯得冇耐性扭計時,媽媽要求爸爸拿玩具給他玩,哥哥就第一時間跑去拿玩具,速度快過佢自己食 飯好多倍;
- 有時,哥哥會很溫柔地,耐心地教弟弟玩玩具,比媽媽溫柔得多;
- 弟弟有時都會不小心弄壞哥哥辛苦砌好的玩具,此時的哥哥必定會喊和好忿怒,媽媽便說:你唔好嬲弟弟啦!他的年紀還少,還未識規矩,你原諒佢啦!哥哥好快會原諒弟弟,然後繼續玩;
- 當弟弟曳曳,激嬲媽媽(扮作忿怒的樣子)時,哥哥便會對媽媽說:你唔好嬲弟弟啦!弟弟唔識規矩麻;
- 弟弟做錯事時,媽媽說弟弟曳,哥哥說:唔係,係乖!
- 有時媽媽會扮嬲好耐,哥哥便替弟弟求情問:你幾時先至原諒弟弟呀?
- 媽媽再七情上面些,同弟弟說:你咁曳,媽媽就唔要你!那時,哥哥的眼淚就會立即跑出來,喊著說:唔好唔要弟弟呀!(哥哥即刻要媽媽安慰,弟弟還未知發生緊咩事企左係度望來望去!真係笑死人!)
- 弟弟飲奶飲得差,正想向弟弟訓話時,翊翊已用他的小手很大力地掩蓋媽媽的罵人咀巴,不給我鬧弟弟;
- 家庭崇拜後段,翊翊代弟弟帶祈禱,向天父說:親愛的天父,求你俾媽媽善良D,唔好咁惡對弟弟!(媽媽心裡暗笑)事後,媽媽問翊翊,你知唔知點解媽媽咁惡? 唔知.媽媽答:媽媽係扮出來的,要翹翹知道自己做錯事,如果唔教好他,他將來會變成一個壞人架啦!翊翊似乎部份認同.
- 翊翊有一天問:我求天父叫你善良D,天父有冇聽我的祈禱呀!媽媽答:有,當我善良的時候,天父已聽你的祈禱.翊翊又問:咁媽媽惡的時候,天父咪冇聽我祈禱囉!媽媽答:唔係,係因為你地曳!
不過,當弟弟極度阻礙或破壞哥哥玩玩具時,哥哥對他的愛銳減到只剩下10%,無法啦!利益當前也!
其實,當媽媽看到他倆玩得哈哈大笑的時候,就想到有兄弟姊妹真好啊!願他倆的感情與日俱增,將來互相扶持!
沒有留言:
發佈留言